بطاطس محشيه باللحمه المفرومه

مطبخ حوا 

 نقشر البطاطس و نغسلها و نقورها و ننقعها في مايه و ننقع كمان قلب البطاطس عشان لونها ميغيرش

 نعصج اللحمه المفرومه

في طاسه عالنار نضيف معلقه سمنه و معلقه زيت و ننزل باللحمه المفرومه و نقلب لحد لونها ما يغير نضيف عليها معلقه صغيره فلفل اسود و ملح و السبع بهارات و رشه شطه و نقلب لحد ما تستوى نضيف عليها فلفل الوان متقطع قطع صغيره (اختيارى ممكن تستغنى عنه) و نقلب و نطفي عليها

 نحضر الصلصه في حله عالنار نضيف معلقه كبيره زيت و ننزل عليها بكوب عصير طماطم مصفى و نصف معلقه صغيره فلفل اسود و كمون و ملح و نغطى عليها لحد ما تتسبك شويه و نضيف عليها كوب ماء

( انا استخدمت معلقتين صلصه زودت عليهم كوب ماء و قلبتها كويس )

 بعد ما الطماطم أو الصلصه تتسبك شويه نضيف عليها كوب و نغطى و نسبها على نار متوسطه تغلى غلوتين و نطفي عليها

 في طاسه فيها زيت ساخن ننزل بالبطاطس نحمرها من كل الجوانب للون الذهبى و بعدين نصفيها و نحمر قلب البطاطس و نصفيه من الزيت

 في صينيه نرص البطاطس و نحشيها باللحمه المعصجه و ناخد شويه من اللحمه نقلبها مع قلب البطاطس و نرصها في الصينيه و بعدين نضيف عليها الصلصه و ندخلها الفرن على درجه حراره ١٩٠ في الرف الاوسط بتاخد حوالى من ١٥ ل ٢٠ دقيقه لحد تمام التسويه و تحمر كويس

الف هنا